Raggi bloggar

13.11.2007 | 12:44

Þjóðsögur

Björn á börn

Það er sagt um björninn að hann sé maður í álögum og eigi birnan börn, en þau verði að húnum, ef hún nær að slá yfir þau hramminum. Frá því hefur verið sagt að í Grenivík á Grímsey hafi maður einu sinni komið út og séð birnu, sem bar sig hálfaumlega. Hann sótti henni inn kúamjólk og gaf henni. Seinna um kvöldið, þegar hann fór að taka til heyið, lá hún í hlöðunni og var að gjóta. Hann náði þá einum unga hennar og var það almennilegt meybarn. Fór maðurinn svo inn með barnið og ól það upp nokkra stund ; óx hún og dafnaði vel, en sótti mjög út, þegar hún var kominn á legg, og til sjávar. Loksins tókst henni að komast út á ís á víkinni ; kom þá birna að og brá yfir hana hramminum ; við það brá henni svo að hún varð að bjarndýrshún.

Dýrhóll

Á Lágheiði í Ólafsfirði er hæð ein, sem Dýrhóll heitir. Hann dregur það nafn af því, að einu sinni lá þar bjarndýr. Meðan dýrið hélt sig þar, gekk maður einn yfir heiði með atgeirsstaf í hendi. Þegar dýrið varð vart við manninn, stóð það upp og hristi sig, en lagðist aftur, er það sá atgeirsstafinn. Nú gekk maðurinn inn í Heiðarhöll og mætti þar manni einum úr Fljótum, sem ætlaði út í Ólafsfjörð. Maðurinn, sem utan að kom, varaði hinn við bjarndýrinu og léði honum geirsstaf sinn. Síðan gekk maðurinn út heiði og er hann kom út að Dýrhól, stóð bjarndýrið upp. Gaf það sig ekkert að honum, en tók á rás inn heiði og linnti ekki fyrr en það náði manninum, sem inn yfir gekk, skammt fyrir framan Þrasastaði og drap hann þar.

Flokkur: Bloggar | Breytt s.d. kl. 12:49 | Facebook